Nr. 66           Heimatgruß           Dezember 2002

Der Triebweg bei Hausen

Kornrade als Blume des Jahres 2003

Bilder aus vergangenen Tagen

Langenzenner Betriebe

Indersdorfer Gegenbesuch in Langenzenn

Der Heimatverein berichtet

Verleihung des Ehrenzeichens

Ereignisse im Jahresrückblick

A weng wos iber a Langerzenner Orchinoal, 
wi mer su she sachd


Erzählt vom Schmied Heiner Stinzendörfer.
Aufgeschrieben von Kurt Sellner.

Hinweis zum Lesen: Das "oa" wie bei "doamoals" (= damals) wird nicht als "oa" gesprochen, sondern als "offenes O".

Wie beinoh die groase Gloggn in Kärchersdurm nundergfolln wär

In die sechzger Joahr woars, wos mer der Stinnesn Heiner heier im Summer derzellt hat. Kaum dass mers glam kennerd, wos doamoals, ez muss mer scho soong wos im vergangana Joahrhundärd, in Langerzenn mit unsärär groasn Gloggn beinoh furchbors bassierd wär. Jednfolls ist doamoals um 1960 rum, unser Schmied, där Stinnesn Heiner vom Margtblatz, mit seim Gselln in Knottn Werner, zum Schmiern vo di Gloggnloacher aufn Kärchersdurm nauf. Des Schmiern vo di Gloggnloacher wor scho däretzweng rechd wichdi, wall mär sunsd amend is Gwiedschn vo di Gloggn bis nunder afn Margtblatz kährd hätt. 
Jednfoalls senns oall zwa zun Poppn Veit, unsärm doamoalin Meesnär ganga und ham nen bscheid gsachd, dass sie ezerdla fir zwa Schdund zun Gloggnloacherschmiern aufn Kärchersdurm sen. Un dasser vei jo nid in dära Zeid laidn soll. Wies dann oll zwa afn Kärchersdurm droom woarn, hams zärschd amol die Ausicht ugschaud. Nach vorn naus, nach hintn naus und übärhaubd. Dann senns numoal a Dräbbn nauf zu die Gloggn. Doa hadsi dann a jeder af an Gloggnstull naufgsedzd und had ugfangd, die Loacherschoaln runder zu schraum. So hamms hoald nachärnandär zu gmachd. Wie dann där Stinnesn Heiner groad di anna Loacherschoaln vo där groasn Gloggn daneem hi glechd had, had plödzli dieselbe Gloggn ugfangd zun Schwinga. Zärschd hamms goanid gwist, wos loas is, obär dann had där Stinnesn Heiner zun Knottn Werner nieber bläägd: "Schraub, schraub, sunsd schbringd di Gloggn nu aus di Loacher raus und in Kärchärsdurm nunder!" Doa hamms villeicht gschraubd oal zwa, wie wennsies zoald grichd häddn. Und oal zwa hamms ihr Loacherschoaln grood nu su ugschraubd, bevor di Gloggn durch die Mauern und amend sugoar nu durchs Kärchärdach nundär gfolln wär.
Wooss dann in Poppn Veit dezehld ham, wies dann immer nu schweisbadd widder drundn worn, soll hier wördli nid überlieferd wärn. Und worum där des värgässn had, dass die zwa am Durm drom sen, is a nemmer so gnau bekannt. Gloobd hammsn jednfoalls nid, där Stinnesn Heiner und där Knottn Werner in Poppn Veit. Und groas in Langerzenn rumdezehld hamm sis a nid. Worum? Wall villeichd nochärdla rauskuuma wär, dass si amend doch rächt ausgiebi drom gfäschbärd hemm, odder die Aussicht zu archlang ugschaud häddn, am Langerzenner Kärchersdurm droom.

Ein Langenzenner Original: Der Schmied am Marktplatz Heiner Stinzendörfer

Startseite