Nr. 68           Heimatgruß           Dezember 2004

1050 Jahre Langenzenn:
Der Mittelaltermarkt
Das Kaiserspiel

Die Pfarrei St. Marien

Ein Stück Heimat

Der Heimatverein berichtet

Ereignisse im Jahresrückblick

A weng wos af Langerzennerisch

Allmächd na: 
Karbfn as Boln und Broadwärschd mid Bräd!

Von Georg Ulrich

Wos mi annermoal ärcherd is des, wenn i mir in annera Wärdschafd an Karbfn bstell und i mi afn frei, er kumd und af su an gudn frängischn Karbfn stägd a weißblaus Fenla drauf. Hamsis in Zenngrund oder in Fembachgrund vergässn, dass mir Frangn sen, uns wärgli därfir nid schema braugn und ärschd där Naboleon uns zu bairischn Stoadsbärcher gmachd had, wäll di Baiern zu ihm gholfn ham? Vorhär vo 1806 ham mir zu Breißn ghärd, senn obber bliem, wos mär immer woarn: Frangn.

Ez in Aischgrund drem, doa sens stoltz af Frangn und schdegns a road-weiß Fenla af ir Karbfn.

Obber doa is dene amaol wos bassierd. Doa hams des Schdägala von Fenla verkärd neigschdegd und doa is as frängischn road-weißn Fenla a weißroads bolnisch worn, wäl die bolnischn Farm weiß-road senn. Wos nid oallers gid!
Bei uns an bolnischn Karbfn!
Neili, is obber a scho lang här, is in Fernsegn gsachd worn, dass in unser Broadwärschddärmer a Bräd neigfilld wärd. I hob gmand, mi drifd där Schlooch. Des kenners in Bayern drunden in ihrer Wärschd nei do, obber in unser frängischn Broadwärschd kummd a Broadworschdghäg nei! Had där, där wu des gsachd had, scho ban Seistechn a Broad mid frischn Broadworschdghäg drauf gässn! I glab nid, sunsd kennerd er nid suwos sogn.
Di, di wos mid frängischn Karbfn zu do hom, vo di Weiherbesitzer bis zum Landdogsabgeordnedn Gabsteiger as Kadlspurch, machen si Sorgn um die frängischn Karbfn wegen der billin Kongerenz as Osten und wolln den frängischn Karbfn mähr bekannt machen.
När zu! Obber ded zerschd af an frängischn Karbfn a frängisch Fenla, dermid mer sichd, wu er härkummd.